ალიანს არენაზე სეზონი გაიხსნა ბაიერნმა ფენერბაჰჩეს გადაურბინა

აუდის ამხანაგური ტურნირის 1/2 ფინალურ ეტაპზე მიუნხენის "ბაიერნმა" თურქული "ფენერბაჰჩე" შინ არ დაინდო და მეტოქე საჩოგბურთო ანგარიშით გაანადგურა - 6:1!

ნიკო კოვაჩმა 4-3-3 ტაქტიკა შეარჩია ოპტიმალური და საუკეთესო თერთმეტეულით.

მიუნხენელები ტერიტორიულ უპირატესობას თავიდანვე დაეუფლნენ და დაიწყეს შეტევები. თურქულ კლუბს დაცვაში სერიოზული პრობლემები ჰქონდა და "ბაიერნმა" მალევე დაიწყო უპირატესობის გოლებში გადაზრდა.

პირველი გოლი 22-ე წუთზე გავიდა - შეცვლაზე შემოსულმა თომას მიულერმა მარჯვენა ფრთაზე ბურთი მოიპოვა და ცენტრისკენ ტიაგო ალკანტარას გადააწოდა. ესპანელმა კი საჯარიმოში ლევანდოვსკის ჩინებული პასი გაუკეთა, პოლონელმა კი ცარიელ კართან დაუგორა რენატუ სანჩეშს, რომელმაც მეორე შეხებით ანგარიში გახსნა - 1:0!

რამდენიმე წუთში კინგსლი კომანმა მარცხენა ფრთაზე კარგად იმოქმედა და ცენტრში შემორბენილ ლეონ გორეცკას დაუგორა - გერმანელმა "ფენერბაჰჩეს" მეორე გოლი გაუტანა.

გორეცკას გოლიდან სამ წუთში კი თომას მიულერმა სტუმართა მცველს საჯარიმოში მოპარა ბურთი და თავისი გოლიც გაიტანა - 3:0!

ტაიმის მიწურულს კი კინგსლი კომანმაც გამოიჩინა თავი - ფრანგმა მცველების მორიგი უხეში შეცდომით ისარგებლა და მეტოქის კარი მარტივად აიღო. 4 წუთში კი მიულერმა პენალტი გამოიყენა და პირველ ტაიმში საბოლოო ანგარიში დააფიქსირა - 5:0.

მეორე ნახევარი შედარებით მშვიდი გამოდგა და გუნდებმა ბურთები გაცვალეს. 58-ე წუთზე ნიკლას ზიულემ წინ გრძელი გადაცემა გააკეთა და მიულერმა მეკარის შეცდომით ისარგებლა - 6:0 და ჰეთ-თრიკი!