ბაიერნმა გერმანიის სუპერთასი დათმო

დღეს საღამოს "სიგნალ იდუნა პარკზე" გერმანიაში 2019/20 წლების საფეხბურთო სეზონი სუპერთასის შეხვედრით დაიწყო.

მიუნხენის "ბაიერნმა" დორტმუნდის "ბორუსიასთან" სეზონის პირველი ოფიციალური თამაში დათმო და სუპერთასი დორტმუნდში დარჩა.

პირველ ტაიმში "რეკორდმაისტერი" ტერიტორიულ უპირატესობას ფლობდა და მომენტებიც ჰქონდა, მაგრამ ვერ გამოიყენა და საწყისი 45 წუთი უგოლოდ დასრულდა.

მეორე ტაიმის სტარტზე პაკო ალკასერმა მშვენიერი დარტყმით ანგარიში გახსნა - 1:0. "ბაიერნმა" სცადა სიტუაციის გამოსწორება, მაგრამ კვლავ ძალიან არ გაუმართლა და 69-წუთზე ჯეიდონ სანჩოსგან მეორე ბურთიც მიიღო.

დარჩენილ დროში მიუნხელებმა ვეღარაფერი შეცვალეს და დორტმუნდელებმა 2:0 იმარჯვეს. "ბორუსიამ" გერმანიის სუპერთასის ტიტული მეექვსედ მოიგო და "ბაიერნს" ერთით ჩამორჩება.