ოფიციალურად პერიშიჩი ბაიერნის ფეხბურთელია

მიუნხენის "ბაიერნმა" მილანის "ინტერის" გარემარბის, ივან პერიშიჩის, ტრანსფერი ოფიციალურად დაადასტურა.

30 წლის ხორვატმა ნახევარმცველმა გუშინ სამედიცინო შემოწმება წარმატებით გაიარა, დღეს კი კონტრაქტს მოაწერა ხელი.

პერიშიჩი მიუნხენურმა გრანდმა 1 წლიანი იჯარის წესით დაიმატა 2020 წლის 30 ივნისამდე. სეზონის ბოლოს კლუბს მისი გამოსყიდვის უფლებაც ექნება.

გერმანული პრესის ინფორმაციით, პერიშიჩის იჯარა "ბაიერნს" 5 მილიონი ევრო დაუჯდება, ხოლო მისი გამოსყიდვისთვის 25 მილიონი ევრო იქნება საჭირო.

ივან პერიშიჩი გერმანულ ფეხბურთს კარგად იცნობს - 2011-13 წლებში ის დორტმუნდის "ბორუსიას" ღირსებას იცავდა, შემდეგ 2013-15 წლებში - "ვოლფსბურგის" და ბოლო ოთხი სეზონი მილანის "ინტერში" დაჰყო.

პერიშიჩს ბუნდესლიგაში სულ 112 თამაში აქვს ჩატარებული და 16 ასისტთან ერთად 27 გოლის გატანა მოახერხა.

პერიშიჩი მსოფლიოს ვიცე-ჩემპიონია - 2018 წლის მსოფლიო ჩემპიონატზე პერიშიჩი ხორვატიის ნაკრების ერთ-ერთი ლიდერი იყო და რუსეთის მუნდიალზე 3 ბურთის გატანა მოახერხა.

"ნერაძურის" მაისურით ჩატარებულ 163 თამაშში პერიშიჩმა 40 გოლი გაიტანა.