ბაიერნმა ფინანსური რეკორდი დაამყარა

2018/19 წლების სეზონი მიუნხენის "ბაიერნისთვის" ეკონომიკური თვალსაზრისით ისტორიაში საუკეთესო გამოდგა.

"ბაიერნის" ფინანსური სამსახურის გენერალურმა დირექტორმა, იან-კრისტიან დრეეზენმა, განაცხადა, რომ "რეკორდმაისტერის" წლიური ბრუნვა გასული სეზონის შედეგად 750 მილიონ ევროს შეადგენდა.

"გასული წელი დიდებული გამოდგა. არამხოლოდ სპორტული, არამედ ეკონომიკური თვალსაზრისითაც. გაყიდვებიდან 750 მილიონი ევრო აბსოლუტური რეკორდია", - აღნიშნა დრეეზენმა.

საინტერესოა, რომ წინა წელთან შედარებით "ბაიერნის" წლიური ბრუნვის მაჩვენებელი თითქმის 100 მილიონი ევროთი გაიზარდა. 2017/18 წლების სეზონის ბოლოს ეს რიცხვი 657.4 მილიონს შეადგენდა.

ამ ზაფხულს მიუნხენურმა გრანდმა ასევე ისტორიულად ყველაზე დიდი ფული დახარჯა - ბენჟამენ პავარის, ლუკა ერნანდესის, მიკელ კუისანკეს, ივან პერიშიჩის, იან ფეტ არპისა და ფილიპე კოუტინიოს ტრანსფერები "ბაიერნს" 143,5 მილიონი ევრო დაუჯდა.