კოვაჩი ტიტულისთვის 4 გუნდი იბრძოლებს

მიუნხენური კლუბის მთავარი მწვრთნელი, ნიკო კოვაჩი, გერმანიის ეროვნულ ჩემპიონატში საკმაოდ სერიზოულ და დაძაბულ კონკურენციას ელოდება.

"ყველა 100%-თ უნდა იყოს მზად და აჩვენოს საუკეთესო ფეხბურთი. ეს ეხება "ბაიერნსაც" და სხვა კონკურენტებსაც - 80-90% საკმარისი არ არის.

მართალია, რომ "ლაიფციგმა" საკმაოდ სერიოზული განაცხადი გააკეთა, მაგრამ იმედი მაქვს, ჩვენ უფრო გაგვიმართლებს.

"ლაიფციგის" მსგავსად ტიტულისთვის დორტმუნდის "ბორუსია" და ლევერკუზენის "ბაიერიც" იბრძოლებენ. სწორედ ეს ოთხეული გაითამაშებს ტიტულს. დაძაბულ რბოლას ველით", - განაცხადა 47 წლის ხორვატმა სპეციალისტმა.

საწყისი სამი ტურის შემდეგ ბუნდესლიგაში 9 ქულით "ლაიფციგი" ლიდერობს. შემდეგ 8 ქულით მოდის "ვოლფსბურგი", "ბაიერნს" და "ბაიერს" კი 7-7 ქულა აქვთ. დორტმუნდის "ბორუსიას" ანგარიშზე 6 ქულაა.

"რეკორდმაისტერი" უკვე ზედიზედ 7 წელია ბუნდესლიგის ვერცხლის სინს არ თმობს და ყველა "ბაიერნის" ჰეგემონიის დამხობას ელოდება.