Bild კომანი რამდენიმე კვირას გამოტოვებს

მიუნხენის "ბაიერნის" ახალგაზრდა გარემარბის, კინგსლი კომანის, დაზიანება სერიოზული არ აღმოჩნდა, მაგრამ "ლივერპულთან" საპასუხო მატჩის გამოტოვების საშიშროება არსებობს.

გერმანიის ბუნდესლიგის 23-ე ტურში, ბერლინის "ჰერტასთან" საშინაო თამაშში (1:0), 22 წლის ფრანგი მოედანზე მეორე ტაიმის დასაწყისში შევიდა და რამდენიმე წუთში კუნთის ტრავმის გამო გასახდელისკენ გაეშურა.

"ბაიერნმა" დაადასტურა, რომ კომანს მარცხენა ფეხის ბარძაყი აქვს დაზიანებული, ხოლო "Bild-ს" ინფორმაციით, კინგსლი ერთიდან-სამ კვირამდე გამოტოვებს.

ეს კი იმას ნიშნავს, რომ კომანის თამაში ჩემპიონთა ლიგის საპასუხო მერვედფინალურ მატჩში საეჭვოა.

"ბაიერნი" საკუთარ მოედანზე "ლივერპულს" 13 მარტს დაუპირისპირდება.