პირობები შეთანხმებულია: კლოპი გერმანიის ნაკრებში დანიშვნასთან ახლოსაა

გერმანიის საფეხბურთო კავშირმა (DFB) ოფიციალური განცხადება გაავრცელა, რომლის მიხედვითაც, ორგანიზაციის პრეზიდენტი ბერნდ ნოიენდორფი და ვიცე-პრეზიდენტი ჰანს-იოახიმ ვაცკე ნიუ-იორკში იურგენ კლოპს შეხვდნენ. ინტენსიური მოლაპარაკებების პირველი რაუნდი გერმანიის ნაკრების მთავარი მწვრთნელის პოსტზე მის შესაძლო დანიშვნას ეხებოდა.

კონსტრუქციული შეხვედრის შედეგად, მხარეებმა პოტენციური კონტრაქტის მთავარ პირობებზე შეთანხმებას მიაღწიეს. მოლაპარაკებები მომავალ კვირას გაგრძელდება. ორივე მხარე დარწმუნებულია, რომ პროცესი წარმატებით დასრულდება, თუმცა ამისთვის საჭიროა საბოლოო შეთანხმება კლოპის ამჟამინდელ დამსაქმებელთან, კომპანია რედ ბულთან. საბოლოო ეტაპზე ნებისმიერი კონტრაქტი DFB-ის სამეთვალყურეო საბჭომ და აქციონერთა ასამბლეამ უნდა დაამტკიცოს.