ტოლისოს დამატება 3 იტალიურ კლუბს სურს

მიუნხენური გრანდის ცენტრალური ნახევარმცველი, კორენტენ ტოლისო, იტალიური ტოპ-კლუბების ინტერესის ქვეშ მოექცა.

გუშინ ფრანგულმა გამოცემა "Le10Sport-მა" გაავრცელა, რომ 25 წლის ფრანგი ფეხბურთელით ტურინის "იუვენტუსი" და "ნაპოლი" ინტერესდებიან და მზად არიან მის სანაცვლოდ 35 მილიონი ევრო გადაიხადონ.

მოგვიანებით კი იტალიურ გაზეთ "La Gazzetta dello Sport-ში" დაიწერა, რომ კოკოს მილანის "ინტერიც" აკვირდება. ტოლისოს გადაბირება "ნერაძურის" მთავარ მწვრთნელს, ანტონიო კონტეს, სურს.

ბოლო ინფორმაციით, "რეკორდმაისტერის" ხელმძღვანელობა მზად არის ტოლისოს გასაშვებად და სავარაუდო სატრანსფერო ღირებულება 35-40 მილიონ ევროს შეადგენს.

კოკო ტოლისო "ბაიერნმა" 2017 წლის ზაფხულში ლიონის "ოლიმპიკიდან" დაახლოებით 37 მილიონ ევროდ შეიძინა. მსოფლიო ჩემპიონმა აწშეჩერებულ სეზონში 23 მატჩი ჩაატარა და 3 ბურთი გაიტანა.