ჰუმელსის მეუღლე ლევანდოვსკის კომენტარს გამოეხმაურა

მიუნხენის "ბაიერნის" ყოფილი ცენტრალური მცველის, მატს ჰუმელსის, მეუღლე კეტი ჰუმელსი "რეკორდმაისტერის" ცენტრალური თავდამსხმელის, რობერტ ლევანდოვსკის, განცხადებამ გააღიზიანა.

30 წლის პოლონელმა ფორვარდმა რამდენიმე დღის წინ გერმანულ პრესასთან საუბარში აღნიშნა, რომ ჰუმელსმა უარი თქვა "ბაიერნში" ადგილისთვის ბრძოლაზე და კლუბი დატოვა.

კეტი ჰუმელსმა კი თავისი მეუღლე დაიცვა: "მატს ჰუმელსი იმიტომ არ წასულა, რომ შეეშინდა. მას უნდოდა, რომ საუკეთესო სიტუაციაში ყოფილიყო და მიუნხენში ასე აღარ იყო".

30 წლის გამოცდილი გერმანელი დორტმუნდის "ბორუსიას" 37 მილიონ ევროდ დაუბრუნდა და ახალი სეზონიდან კვლავ "ბაიერნის" მეტოქე იქნება.

ლუკა ერნანდესისა და ბენჟამენ პავარის ტრანსფერების შემდეგ "ბაიერნმა" მატს ჰუმელსს განუცხადა, რომ ძირითადში თამაშის გარანტიას ვერ მისცემდა, რამაც გერმანელს წასვლისკენ უბიძგა.