ბაიერნი პაოლო მალდინის რჩეულის ტრანსფერზე მუშაობს

მიუნხენის "ბაიერნი" ამომავალი ვარსკვლავების ტრანსფერებზე მუშაობას განაგრძობს.

ამჯერად "რეკორდმაისტერის" რადარზე ლიონის "ოლიმპიკის" ტალანტი, პიერ კაულულუ გამოჩნდა. 19 წლის ფეხბურთელი პოზიციით მარჯვენა მცველია და მოგეხსენებათ, კლუბი აქტიურად ცდილობს ამ რგოლის გაძლიერებას.

ახალგაზრდა ფეხბურთელი "მილანის" ინტერესის სფეროშიც არის მოქცეული. წყაროს ცნობით, მას პირადად ესაუბრა ლეგენდარული პაოლო მალდინი და "როსონერიში" გადაბარგება შესთავაზა.

როგორც ცნობილია, მილანელები კაულულუს პირველ გუნდში მუდმივ პრაქტიკას ჰპირდებიან, რაც შეეხება "ბაიერნს", გუნდი მას თავდაპირველად სარეზერვო შემადგენლობას, შემდგომ კი პირველ გუნდში დაწინაურებას სთავაზობს.