რა თხოვნით მიმართა კოუტინიომ თავის აგენტს

მოგეხსენებათ, მიმდინარე სეზონის დასრულების შემდეგ ფილიპე კოუტინიო მიუნხენის "ბაიერნის" რიგებს დატოვებს. თუმცა, ამ დრომდე უცნობია სად გააგრძელებს ის კარიერას.

ბრიტანული გამოცემების ინფორმაციით, 28 წლის ნახევარმცველმა საკუთარ აგენტს თხოვნით მიმართა, რომ მანამ, სანამ "რეკორდმაისტერი" ჩემპიონთა ლიგაზე გამოდის, ყველანაირი მოლაპარაკებები შეაჩეროს.

როგორც ჩანს, ბრაზილიელი ფეხბურთელის სურვილია, რომ ამ პერიოდის მანძილზე მთელი ყურადღება ევროტურნირებზე და "ბაიერნზე" ჰქონდეს მიმართული, სხვა კლუბებთან კონტაქტი კი ამაში ხელს შეუშლის.

შეგახსენებთ, რომ კოუტინიო "ბაიერნის" რიგებში იჯარის წესით ირიცხება და კლუბმა მის გამოსყიდვაზე უარი განაცხადა.