კოვაჩმა ლიდერების რაზმი შექმნა გუნდს 6 წინამძღოლი ჰყავს

მიუნხენის "ბაიერნის" მთავარმა მწვრთნელმა, ნიკო კოვაჩმა, შემადგენლობიდან 6 გამორჩეული, ყველაზე გამოცდილი მოთამაშე გამოჰყო და მათ "ლიდერის" სტატუსი მიანიჭა.

გერმანული გამოცემა "SportBild" იტყობინება, რომ ხორვატმა სპეციალისტმა "ლიდერების რაზმში" მანუელ ნოიერი, იოზუა კიმიხი, დავიდ ალაბა, ტიაგო ალკანტარა, თომას მიულერი და რობერტ ლევანდოვსკი შეიყვანა.

ტიაგო იქნება იმ მოთამაშეების წარმომადგენელი, რომლებიც ესპანურად საუბრობენ, ხოლო კიმიხი - ახალგაზრდების.

ნიკო კოვაჩმა თავისი არჩევანი ასე განმარტა: "ტიაგო მოედანზეც და მოედნის მიღმაც ლიდერია. ალაბა უკვე დიდი ხანია ბევრს მუშაობს, რათა იყოს იქ, სადაც ახლა იმყოფება".

2019/20 წლების სეზონი "ბაიერნმა" არც ისე კარგად დაიწყო. მიუნხენელებმა სუპერთასი დორტმუნდის "ბორუსიას" დაუთმეს, ბუნდესლიგის საწყის სამ ტურში კი 7 ქულა მოიპოვეს და ლიდერ "ლაიფციგს" ორი ქულით ჩამორჩებიან.