მიულერი ბაიერნის რეკორდსმენი გახდა

მიუნხენის "ბაიერნის" შემტევი ნახევარმცველი, თომას მიულერი, კლუბის ისტორიაში უნიკალური მიღწევით შევიდა.

ჩემპიონთა ლიგის 2019/20 წლების სეზონი "რეკორდმაისტერმა" "ცრვენა ზვეზდასთან" საშინაო მატჩით გახსნა და სერბული კლუბი შინ 3:0 გაანადგურა.

30 წლის გერმანელი თამაშში მეორე ტაიმში ჩაერთო და გოლის გატანაც მოახერხა. მიულერმა ჩემპიონთა ლიგაზე "ბაიერნის" მაისურით 106-ე მატჩი ჩაატარა და კლუბის ყველა დროის რეკორდსმენი გახდა.

თომასმა ლეგენდარული ფილიპ ლამის (105) შედეგი გააუმჯობესა და ჯერ კიდევ აქვს დრო, რომ რეკორდი განიმტკიცოს.

ჩემპიონთა ლიგაზე "ბაიერნის" მაისურით ყველაზე მეტი მატჩი ჩატარებული აქვთ:

1. თომას მიულერი - 106

2. ფილიპ ლამი - 105

3. ოლივერ კანი - 103

4. ბასტიან შვაინშტაიგერი - 89

5. ფრანკ რიბერი - 87