პირველი მინი კრიზისი? - ბაიერნის ძრავი შემოწმებას ითხოვს

ჰამბურგმა ბაიერნს ცეცხლოვანი, გაბედული თამაში "აჩუქა" და დამსახურებული ქულით დაჯილდოვდა. ფაბიო ვიეირამ მასპინძლები პენალტით დააწინაურა, სანამ ჰარი კეინი შესვენებამდე ცოტა ხნით ადრე გაათანაბრებდა. ლუის დიასმა შესვენებისთანავე შეცვალა თამაში, მაგრამ ლუკა ვუსკოვიჩის გოლით საბოლოო ანგარიში 2-2 დაფიქსირდა.

მიუხედავად იმისა, რომ ჰამბურგმა ქულა გამარჯვებასავით აღნიშნა, ფრე ბაიერნისთვის უფრო დამარცხებას ჰგავდა, რასაც კაპიტანმა მანუელ ნოიერმა თამაშის შემდეგ ხაზი მკაფიოდ გაუსვა. აუგსბურგთან სეზონის პირველი მარცხიდან ერთი კვირის შემდეგ, ლიგის ლიდერმა კიდევ ერთხელ დაკარგა ქულები, დორტმუნდს კი შეუძლია, რომ დღეს ჩამორჩენა შეამციროს და მცირედით იმპულსი კიდევ გაზარდოს.

შესამჩნევია, რომ ბოლო შედეგებიდან გამომდინარე აშკარად იკვეთება გარკვეული თანმიმდევრულობა. ბაიერნი კვლავ აკონტროლებს თამაშების დიდ ნაწილს, მაგრამ უკვე იშვიათად სარგებლობს ამით. აუგსბურგის წინააღმდეგ გუნდს 1.47 მოსალოდნელი საგოლე მაჩვენებელი ჰქონდა მიუხედავად იმისა, რომ ბურთს 70%-ით ფლობდა, ხოლო ჰამბურგმა თითქმის იგივე შედეგი აჩვენა 1.17-ით. თამაში, რომელიც სტატისტიკურად გაცილებით დაძაბული იყო, ვიდრე ვიზუალურ შთაბეჭდილებას ტოვებდა.

გარდა ამისა, ბაიერნის ფეხბურთელები ახალი წლის დასაწყისში ხშირად ჩამორჩებოდნენ ან ვერ ახერხებდნენ ლიდერობის თანმიმდევრულ დაცვას და შენარჩუნებას. გუნდი ჩამორჩებოდა კიოლნს, ლაიფციგს და ჰამბურგს (სწრაფად გაიტანეს გოლები ვოლფსბურგთან და კვლავ ჰამბურგთან). სტაბილურობა, რომელიც ბაიერნს სეზონის დიდი ნაწილის განმავლობაში ახასიათებდა, ახლახანს დაიკარგა.

სეზონის მეორე ნახევრის პირველი სამი თამაშიდან ოთხი ქულით, ბაიერნმა ბუნდესლიგაში იმდენივე ქულა დააგროვა, რამდენიც ბოლოს 2014/15 წლების სეზონში.

სპორტულმა დირექტორმა, მაქს ებერლმა ჰამბურგთან ფრედ დასრულებული მატჩის შემდეგ მკაფიო სიტყვებით ისაუბრა: "ჩვენი შეცდომები ისჯება. არ ვნერვიულობ ჩვენს შეტევაზე, რადგან ბევრ შანსს ვქმნით, მაგრამ დაცვაში ძალიან ბევრ ბურთს ვუშვებთ", - განმარტა 52 წლის მენეჯერმა. შეფასება, რომელიც შეესაბამება ბოლო კვირების შთაბეჭდილებას და შედეგებს.

ბაიერნს გასული წლის ბოლოს 90 წუთის განმავლობაში მაღალი დონის შენარჩუნებასთან დაკავშირებით უკვე მზარდი პრობლემები ჰქონდა. ვოლფსბურგის ან ლაიფციგის წინააღმდეგ აშკარა გამარჯვებების დროსაც კი, ყოველთვის იყო ფაზები, რომლებშიც მოწინააღმდეგე პოულობდა სივრცეებს - მაგრამ ვერ ახერხებდა მათ თანმიმდევრულად გამოყენებას. ეს სისუსტეები ამჟამად მკაცრად ისჯება.

ერთ-ერთი ფაქტორი, რომელიც სიტუაციას კიდევ უფრო ფეთქებადს ხდის, არის ის, რომ ვენსან კომპანის უკვე შეუძლია მოთამაშეთა სრული შემადგენლობის გამოყენება. ჯამალ მუსიალა, ჰიროკი იტო და ალფონსო დევისი კვლავ მზად არიან თამაშისთვის, იოსიპ სტანისიჩი და საშა ბოეი კი ცოტა ხნის წინ დაბრუნდნენ. ჰამბურგში თამაშს მხოლოდ კონრად ლაიმერი და რაფაელ გერეირო აკლდათ, რაც იმას ნიშნავს, რომ ხშირად გამოყენებული საუბრები ტრავმებთან დაკავშირებით უკვე აღარ იმუშავებს.

კომპანი ახლა თითქმის სრული შემადგენლობიდან სწორი გადაწყვეტილებების მიღებისა და გუნდში მეტი სტაბილურობის, სიმკვეთრის დაბრუნების ამოცანის წინაშე დგას. პანიკის საფუძველი არ არსებობს: ბაიერნი კვლავ ლიდერობს ბუნდესლიგაში და პირდაპირ გავიდა ჩემპიონთა ლიგის მერვედფინალში.

თუმცა, ეს "მინი კრიზისი" არასასურველ დროს დადგა. ლიგაში გუნდი ჰოფენჰაიმს ელის, კარგ ფორმაში მყოფ მეტოქეს, რომელმაც ბოლო ათი თამაშიდან ცხრა მოიგო. სამი დღის შემდეგ ლაიფციგთან თასის მატჩია. გერმანიის თასზე შეცდომამ შეიძლება სწრაფად გამოიწვიოს სერიოზული შედეგები - როგორც სპორტული, ასევე ატმოსფერული თვალსაზრისით.

ბაიერნს მღელვარე დღეები ელის. ყველაფერი კვლავ კონტროლის ქვეშაა, მაგრამ გამაფრთხილებელი ნიშნების იგნორირება აღარ შეიძლება.