„რატომ უნდა მეშინოდეს?“ - კიმიხის ირონიული პასუხი უეფას შესაძლო სანქციებზე

მიუნხენის ბაიერნის ვარსკვლავები, იოზუა კიმიხი და მაიკლ ოლისე, სკანდალის ეპიცენტრში არიან. მათ მიერ მიღებულმა „საეჭვო“ ყვითელმა ბარათებმა უეფა აალაპარაკა — ორგანიზაცია გამოძიების დაწყებას არც უარყოფს და არც ადასტურებს, რაც ფეხბურთელებს 2-მატჩიანი დისკვალიფიკაციით ემუქრება.

კიმიხი ბრალდებებს ირონიით პასუხობს და განზრახვას კატეგორიულად უარყოფს: „არა, განზრახ არ ყოფილა. უბრალოდ პასის გაკეთებას არ ვჩქარობდი, რომ მეტოქის პრესინგში არ მოვხვედრილიყავი. მსაჯს სიმშვიდე რომ შეენარჩუნებინა, ბარათიც არ იქნებოდა.“

„რატომ უნდა მეშინოდეს? ყვითელი ბარათი დასჯადი არ არის. ეს არ ყოფილა განზრახ.“

მიუხედავად ფეხბურთელის თავდაჯერებისა, უეფას სადისციპლინო კომიტეტი ვიდეომასალას სწავლობს.