სულ ცოტა ხნის წინ გავრცელდა ინფორმაცია, რომლის მიხედვითაც მიუნხენის "ბაიერნი" მარიო გიოტცეს დაბრუნება სურს. დღეს ამ ტრანსფერთან დაკავშირებით საინტერესო ცნობები გაჟღერდა.
კერძოდ, Bild-ის ინფორმაციით, 28 წლის ფეხბურთელის დამატება პირადად ჰანს ფლიკს სურს. მოგეხსენებათ, გუნდის დამრიგებელი გერმანიის სამწვრთნელო შტაბში მუშაობდა და შესაბამისად, გიოტცეს შესაძლებლობებს კარგად იცნობს და სჯერა, რომ მას ფორმის დაბრუნება შეუძლია.
თუმცა, "რეკორდმაისტერის" ხელმძღვანელობა ფეხბურთელის დაბრუნებას გარკვეულ რისკად აფასებს და ამის გამო უარზეა. ისინი მიიჩნევენ, რომ გიოტცეს დამატების შემთხვევაში კლუბზე ზეწოლა გაიზრდება, რადგან მარიო მხოლოდ სათადარიგო რგოლის მოთამაშედ განიხილება და მედია ამას უარყოფითად გააშუქებს.
იმ შემთხვევაში, თუ გიოტცე "ბაიერნში" დაბრუნდება, მაშინ ის ერთწლიან კონტრაქტს მოაწერს ხელს, გახანგრძლივების პერსპექტივით.
