ჟოაო კანსელოს პირველი კომენტარი ბაიერნში დებიუტის შემდეგ

გერმანიის თასის 1/8 ფინალურ ეტაპზე, მიუნხენის ბაიერნი სტუმრად მაინცს დაუპირისპირდა და მეტოქე 0:4 გაანადგურა.

აღნიშნულ შეხვედრაში შედგა მიუნხენელთა ახალწვეულის, ჟოაო კანსელოს დებიუტი, რომელმაც თავი საგოლე გადაცემით გამოიჩნა.

მატჩის დასრულების შემდეგ, კანსელომ ჟურნალისტებთან ისაუბრა და საკუთარი დებიუტი შეაფასა:

"ძალიან ბედნიერი ვარ, რომ გამარჯვებაში ჩემი წვლილი შევიტანე და ვხედავ, რომ ძალიან ერთიანი გუნდი გვყავს - ეს ყოველივე მახარებს.

ეს იყო შესანიშნავი თამაში მთელი გუნდისგან. ჩემი თანაგუნდელები ცდილობენ, რაც შეიძლება მალე გავიარო ადაპტაციის პერიოდი და გუნდს მოვერგო, ამიტომაც ვფიქრობ, რომ ჩემი დებიუტი კარგი იყო.

ყველაზე მნიშვნელოვანი კი გამარჯვება იყო, რომელიც მოვიპოვეთ. ჩვენ გერმანიის თასის 1/4 ფინალში ვართ და ძალიან ბედნიერი ვარ", - თქვა კანსელომ.