ვინ გამოაკლდება ბაიერნს? - ებერლის პირველი კომენტარი ტრავმებზე

მაქს ებერლმა ბერგამოში მიუნხენის ბაიერნის ფეხბურთელების მდგომარეობაზე ისაუბრა და რამდენიმე მნიშვნელოვანი სიახლე გააჟღერა.

კლუბის სპორტული დირექტორის თქმით, ყველაზე ნაკლებად სერიოზულია ჯამალ მუსიალას მდგომარეობა. ებერლის განმარტებით, ახალგაზრდა ნახევარმცველის მოედანზე ცვლილება მხოლოდ სიფრთხილის ზომა იყო და მისი ტრავმა დიდ პრობლემას არ წარმოადგენს.

რაც შეეხება ალფონსო დეივისს, სიტუაცია შედარებით სერიოზულია. ებერლის თქმით, დეივისს ისევ კუნთთან დაკავშირებული პრობლემა აქვს, რაც სამწვრთნელო შტაბისთვის გარკვეულ თავსატეხს ქმნის.

კითხვაზე, რა მდგომარეობაშია ახალგაზრდა მეკარე იონას ურბიგი, ბაიერნის წარმომადგენელმა აღნიშნა, რომ ზუსტი ინფორმაცია ამ ეტაპზე არ აქვს. მისი თქმით, ურბიგს თავბრუსხვევა და თავის ტკივილიც ჰქონდა.

ბაიერნის სამედიცინო შტაბი ფეხბურთელების მდგომარეობას უახლოეს საათებში კიდევ ერთხელ შეაფასებს, რის შემდეგაც უფრო დეტალური ინფორმაცია გახდება ცნობილი.