ბაიერნში ებერლის მომავალზე მნიშვნელოვანი შეხვედრა იგეგმება

მიუნხენის ბაიერნის სპორტული დირექტორის, მაქს ებერლის მომავალი კლუბში იმაზე უფრო გაურკვეველია, ვიდრე თავდაპირველად ჩანდა. მისი კონტრაქტი 2027 წლის ივნისამდე მოქმედებს, თუმცა ამ ეტაპზე გახანგრძლივების შანსები დაახლოებით 50-50-ზეა.

ერთ-ერთი ნიშანი იმისა, რომ სიტუაცია ბოლომდე ნათელი არ არის, ნილს შმატკეს შემთხვევაა. ებერლს სურდა, რომ სკაუტინგის ხელმძღვანელის კონტრაქტი გრძელვადიანად გაეხანგრძლივებინათ, თუმცა კლუბის ხელმძღვანელობამ მას მხოლოდ ერთწლიანი ხელშეკრულება შესთავაზა. ეს ნიშნავს, რომ თუ ებერლი ბაიერნში არ დარჩება, მისი ახლო თანამოაზრის კონტრაქტიც 2027 წლის 30 ივნისს დასრულდება.

გარედან შეიძლება გასაკვირი ჩანდეს, რომ ებერლის საკითხი კლუბის შიგნით ასე აქტიურად განიხილება. ბოლოს და ბოლოს, მან ზედამხედველთა საბჭოს მოთხოვნა შეასრულა — შეამცირა გუნდის შემადგენლობა და სახელფასო ბიუჯეტი, ამასთან ერთად სპორტული შედეგებიც შენარჩუნდა. მის მიერ მოყვანილი ფეხბურთელები, მათ შორის ვენსან კომპანი, ლუის დიასი, მაიკლ ოლისე, ჯონათან ტა და იონას ურბიგი, წარმატებულ ტრანსფერებად ითვლებიან.

მიუხედავად ამისა, როგორც იწერება, ებერლსა და კლუბის უმაღლეს ხელმძღვანელობას შორის სრული ნდობა ჯერ კიდევ არ ჩამოყალიბებულა. ერთ-ერთი მიზეზი ისაა, რომ ებერლი ხშირად ზედამხედველთა საბჭოს პროცესში გვიან ერთვებოდა, ასევე ცდილობდა კონტრაქტების საკითხი სწრაფად გადაეწყვიტა, რაც ზოგჯერ კლუბს ფინანსურადაც უჯდებოდა.

მისი მომავლის საკითხი მაისში დაგეგმილ ზედამხედველთა საბჭოს შეხვედრაზე განიხილება, ხოლო საბოლოო გადაწყვეტილება სავარაუდოდ აგვისტოს სხდომაზე მიიღება.