ბაიერნში ელოდებიან - როდის გადაწყდება ურბიგის საკითხი?

იონას ურბიგმა ვარჯიში გუშინ კი განაახლა, მაგრამ ატალანტასთან ხვალინდელ მატჩში მისი თამაში ჯერ კიდევ კითხვის ნიშნის ქვეშაა.

მეკარემ ყველა საჭირო ტესტი კარგი შედეგებით გაიარა, თუმცა გარკვეული დისკომფორტი მაინც იგრძნო, განსაკუთრებით ჰაერში მოქმედებების შემდეგ დაშვებისას.

საბოლოო გადაწყვეტილება მიიღება ან დღევანდელი ბოლო ვარჯიშის შემდეგ, ან უშუალოდ მატჩის დღეს.

უეფას პროტოკოლის მიხედვით, თავის ტრავმის შემთხვევაში ფეხბურთელს თამაში მხოლოდ მაშინ შეუძლია, როცა სრულად, სიმპტომების გარეშე ჩაატარებს ვარჯიშს — ამის შემდეგ კი საბოლოო ნებართვას გუნდის ექიმი გასცემს. დამატებით საჭიროა დამოუკიდებელი ნევროლოგის შემოწმებაც.