ვენსან კომპანი დორტმუნდთან მატჩის შემდეგ:

„ვგრძნობდი, რომ პირველი გოლის მომენტამდე ბურთს კარგ ტემპზე ვამოძრავებდით. შანსებს ვქმნიდით აქა-იქ.

გულშემატკივრის თვალით რომ შევხედო, ბილეთს აუცილებლად ვიყიდიდი ასეთი მატჩისთვის. მაგრამ როგორც მწვრთნელს, ცოტა მეტი კონტროლი გინდა. უფრო მეტი ის, რაც პირველ ტაიმში გვქონდა. ბოლომდე ვიბრძოლეთ ამ მატჩის მოსაგებად და ვგრძნობდი, რომ მეტოქეც იგივეს აკეთებდა.

თამაშის ტაქტიკურად ანალიზი შეიძლება, მაგრამ თუ ასეთ თამაშებს ვერ ვიღებთ, მერე გვწყინს, რომ ასეთი ემოციები არ გვქონდა. ასე რომ, შერეული გრძნობებია.

დღის ბოლოს, ჩვენ გვინდოდა ლევერკუზენზე 6 ქულით წინ ვყოფილიყავით. სეზონის ამ ეტაპზე ყოველი ქულა ძვირფასია — ასე რომ, კარგი ქულაა.“

თომას მიულერი დორტმუნდთან ფრეზე საუბრობს:

„დღეს ენერგიის ნაკლებობას ვერ დავაბრალებთ. გამარჯვება ძალიან გვინდოდა. მაგრამ გამოსვლა ისეთი არ იყო, როგორიც გვსურდა.

გულშემატკივრებისთვის მშვენიერი მატჩი გამოვიდა. შეცვლები კარგი აღმოჩნდა - სერჟმა შესანიშნავად ითამაშა.

ბევრი ენერგია გვქონდა, თუმცა პრობლემა გამორჩენილი მომენტები იყო. მიუხედავად ამისა, დავანახეთ, რომ შეგვიძლია ბევრი შანსის შექმნა და ეს მოგვცემს დიდ ბონუსს ოთხშაბათს.

მე ვხედავ გუნდს, რომელსაც შეუძლია ჩემპიონთა ლიგის შემდეგ ეტაპზე გასვლა.“

ული ჰიონესი მაქს ებერლზე და მის მუშაობაზე:

„მაქსი ჩვენთან სეზონის შუაში მოვიდა, რაც მისთვის რთული სიტუაცია იყო. ახალ მწვრთნელს ვეძებდით და ბევრ ფეხბურთელს კონტრაქტი ეწურებოდა. ახლა მწვრთნელთან ყველაფერი კარგად მიდის, მაქსიც კარგ სამუშაოს ასრულებს.

რა თქმა უნდა, როცა ხელმძღვანელ პოზიციაზე ხარ, გინდა, რომ ბევრი ტიტული მოიგო და ამ სეზონში ჯერ კიდევ არის რაღაც მოსაგები.

ახლა მაქსს მშვიდ გარემოში მუშაობის საშუალება უნდა მივცეთ.“

„თუ ვირცი და მუსიალა გუნდში იქნებიან, მიულერი აღარ დაგჭირდება. ვხედავ დიდ შანსს, რომ ბაიერნმა ის გაიფორმოს.

რაც ული ჰიონესს სურს, როგორც წესი, სრულდება კიდეც.“

მათეუსის ეს განცხადება პირდაპირ მიანიშნებს იმ ცვლილებაზე, რაც ბაიერნში ახალი თაობის ჩამოყალიბებას უკავშირდება. კლუბი, რომელიც წლების განმავლობაში თომას მიულერზე იყო დაფუძნებული შემტევ ფაზაში, ახლა თვალს უკვე ვირცისა და მუსიალას დუეტზე ამახვილებს.