დაიო უპამეკანოს მოქმედ კონტრაქტში „ბაიერნთან“ გამოსასყიდი თანხა 120 მილიონ ევროს შეადგენს. 

ამჟამად ახალი ხელშეკრულების თაობაზე მოლაპარაკებები მიმდინარეობს და შესაძლოა, ახალ კონტრაქტშიც ჩაიწეროს გამოსასყიდი პუნქტი.

მითი იმის შესახებ, რომ „ბაიერნი“ არ უშვებს თავის ფეხბურთელების კონტრაქტებში გამოსასყიდ მუხლებს, ახლა უკვე სრულად წარსულს ჩაბარდა.

„ბაიერნმა“ კიმიხს ახალი კონტრაქტი შესთავაზა, რომელიც ოდნავ გაუმჯობესებული იყო მოქმედთან შედარებით – ამჟამად ის დაახლოებით 20 მილიონ ევროს გამოიმუშავებს წელიწადში. თუმცა, ორშაბათს გამართულ სამეთვალყურეო საბჭოს შეხვედრაზე მიღებულ იქნა გადაწყვეტილება, რომ კლუბმა თავისი შეთავაზება უკან გამოიწვიოს, რადგან ფეხბურთელი მეტისმეტად დიდხანს აჭიანურებდა პასუხს.

გაგრძელების შესაძლებლობა საბოლოოდ არ არის გამორიცხული. მიუხედავად იმისა, რომ შეთავაზება უკან იქნა გამოთხოვილი, მხარეებს შორის მოლაპარაკებები კვლავ გრძელდება, თუმცა საეჭვოა, „ბაიერნმა“ კიმიხს იგივე პირობები კვლავ შესთავაზოს.

თომას მიულერს არ ექნება პრობლემა, იყოს სათადარიგო მოთამაშე, თუ მომდევნო სეზონშიც დარჩება „ბაიერნში“. მას კარგად ესმის, რომ აღარ იქნება რეგულარული სასტარტო შემადგენლობის წევრი. რაც შეეხება ხელფასს, „ბაიერნი“ აღარ გადაუხდის მიულერს 17 მილიონ ევროს, ხოლო თავად ფეხბურთელიც მზად არის, შემცირებული ხელფასით დარჩეს – ორივე მხარემ უნდა შეათანხმოს „სამართლიანი თანხა“.

ნოემბერში ებერლსა და მიულერს შორის პირველი განხილვა შედგა, ხოლო მოლაპარაკებები მარტსა და აპრილში გაგრძელდება. თუ ის ზაფხულში „ბაიერნს“ დატოვებს, ეს აუცილებლად არ ნიშნავს კარიერის დასრულებას. MLS-ის კლუბები უკვე ცდილობენ მიულერის გადაბირებას, ისე როგორც ადრე „ბაიერნის“ სხვა ლეგენდები – გერდ მიულერი და ფრანც ბეკენბაუერი – კარიერის ბოლოს აშშ-ში გადაბარგდნენ.